Sajak Sunda

Sajak Budak Angon

Ku Toni Lesmana

Di pangangonan

Kuring

Jadi taneuh nu diseuseup jukut

Jadi jukut nu diremus domba

Jadi domba nu direcah maung

Jadi maung nu digorogot waktu

Jadi waktu nu diangon ku Anjeun

Anjeun, Anjeun, geulak-gelik, luhureun tonggong panonpoé

Niup suling pinuh kasimpé, pinuh timburu

Di dieu, aya angin nu satia ka kuring

Di langit, saha nu satia ka anjeun?

Haréwos Bojong

Ku Hadi Faturrohman

Dina tungtung peuting

Basa hujan teu jadi datang

Aya haréwos na jeroning haté

Teu apal saha-sahana

Teu nyaho rupana

Teu inget di mana kungsi panggih jeung manéhna

Tapi éta haréwos

Lir sora galura di sagara

Éstu matak ketir

Éstu matak gimir

Sok sanajan ngan ukur haréwos

Nu matak ahéngna

Éta sora kungsi jadi ciri

Lamun kuring keur nandangan kanyeri

Najan ukur bari ngaharéwos

April 2007

Matri Asih

-keur Riskawati

Ku Dhipa Galuh Purba

Tanggkal kamuning téh dipelak

Dina ati, jungjunan

Kasono nu sering adug-lajer

Hoyong metik kembangna

Nyeuseup wangi angin-anginan

Pasini téh dibeungkeut

Dina ati, jungjunan

Pageuh, hamo udar

Dadak-dadakan

Kaasih nu salawasna

Nganteng

Hoyong maheutkeun

Lalakon cinta

Urang patri

Najan dibeuleum ku widi

Dikeclakan cimata

Pageuh

Weweg

Seja sumerah ka Ajawajala

Geusan tumut kana kersa-Na

Ranggon Panyileukan, 10 Rajab 1426 H

Haté Tunggara

Ku Eulis

Dinten ieu, panon poé soék

Langit hideung, nyandak cipanon anu ngembeng

Haté ngajerit maratan langit

Ngocéak maratan jagat

Anjeun téh aya di mana

Didieu, dipangumbaraan abdi, sedih nyandak tunggara.

Dinten ieu, jalan panjang tos kabuka

Kantun urang tiasa ngaléngkahna

Nyandak mangrébu carita, nyancak rasa haté

Anu tunggara sareng haté nu gondéwah.

Pangumbaraan, Januari 3-2008